Găn rơgao rơbêh 30 thun akŏ pơjing tơlơi rô nao rai pơtom hiăp, sit biă hăng bruă hrưn đĭ ngă hrŏm yôm phăn djop mơta amăng thun 2022, tơlơi rô nao rai Việt Nam-Hàn Quốc glăk amăng rơwang pơđĭ kyar hiam klă hloh dong mơng hlâo anun. Tui Khua git gai pơ ala mơnuih ƀôn sang dêh čar ơi Trần Thanh Mẫn, anai lĕ atur kiăng hơdôm anom bơwih ƀong sĭ mơdrô dua bơnah hơđong pran jua ngă hrŏm sui thun, pok prong ƀiă dong hăng truh kih ƀiă dong.

Hơdôm thun rơgao, dêh čar Hàn Quốc lêng kơ dong tal sa kơ bruă tuh pơ alin ƀơi Việt Nam, tui jŭ yap truh abih blan 11 thun anai giăm 90 klai đôlar Mi. Khua git gai pơ ala mơnuih ƀôn sang dêh čar ơi Trần Thanh Mẫn čang rơmang pơ anăp, grup Samsung djru brơi Việt Nam hrưn đĭ boh thâo amăng anom bơwih ƀong amăng lŏn ia kiăng dưi mut hrŏm ba gơnam sĭ mơdrô mơng grup; čang rơmang grup amra jing anom bruă tuh pơ alin sui thun, pơgôp prong amăng tơlơi bơwih ƀong ƀơi Việt Nam, pơđĭ kyar tuh tia pơkra ming djru ba.