VOV4.Jarai - Tlam lơ 27/1, ƀơi Ƀirô mă bruă, Khua git gai pơ ala mơnuih ƀon sang dêh čar ơi Vương Đình Huệ bưp ƀô̆ mơta, pơpŭ thun phrâo ƀing khua mua, ƀing khua pơ ala mă bruă gah gơnong glông, mơnuih apăn bruă, mơnuih mă bruă amăng anom bruă Ƀirô Khua pơ ala mơnuih ƀon sang dêh čar; nao jơnum pơpŭ hơdôm khul grup, ƀing mơnuih mă bruă rơgơi amăng pơphô bruă, djru bruă amăng Jơnum ƀu tui tơđar lok blung a, Khua pơ ala mơnuih ƀon sang dêh čar tal XV. Đĭ pơhiăp amăng mông jơnum, ơi Vương Đình Huệ lăi pơtong, dêh čar ta hơmâo găn rơgao thun 2021 hăng lu tơlơi glêh tơnap. Bruă mă amăng Ƀirô Khua pơ ala mơnuih ƀon sang dêh čar lĕ jơnum pơƀut hrŏm. Hơdôm lok pơphun jơnum juăt pơphun tum pơƀut abih bang khua mua. Yua anun, klin Covid-19 hơmâo bơbeč nao bruă mă amăng Ƀirô Khua pơ ala mơnuih ƀon sang dêh čar. Ơi Vương Đình Huệ pơpŭ, tŭ yap hăng lăng yôm pran gum pơgôp abih pran jua mơng ƀing mơnuih apăn bruă, mơnuih mă bruă amăng anom bruă Ƀirô Khua pơ ala mơnuih ƀon sang dêh čar, čang rơmang, thun 2022, ƀing mơnuih apăn bruă, mơnuih mă bruă amăng anom bruă Ƀirô Khua pơ ala mơnuih ƀon sang dêh čar kiăng mă bruă klă ƀiă dong, gơgrong hăng mut hrŏm, kiăng pơgiong klă bruă amăng thun 2021.

Siu Đoan: Pơblang