Dua čô khua hok mơ-ak lơm ƀuh tơlơi rô nao rai giang mah hăng ngă hrŏm hiam klă kơplah wah dua boh dêh čar ƀu pơdơi hơkrŭ hăng pơđĭ kyar. Bruă ngă hrŏm bơwih ƀong huă jai dơlăm tui hăng bruă Thái Lan lĕ dêh čar sĭ mơdrô prong hloh hăng Việt Nam amăng kual ASEAN hăng lĕ dêh čar tuh pơ alin prong tal 2 amăng kual ASEAN.

Thun 2023, dua boh dêh čar hơdor glăi 10 thun akŏ pơjing tơlơi rô nao rai ngă hrŏm sui thun, Khua git gai pơ ala mơnuih ƀôn sang dêh čar ta rơkâo hơdôm anom bruă mơng dua bơnah kơtưn tơlơi rô nao rai ngă hrŏm, pơtrut pok pơhai tơlơi pơčeh “Tlâo pơlir hơbit”, hơmâo pơlir pơgiăng gơnam nao rai; pơlir bơwih ƀong huă, anom bơwih ƀong sĭ mơdrô hăng mơnuih ƀôn sang; pơlir hơdôm hơdră yôm phun pơđĭ kyar hơđong kjăp, gir run tañ pơgiong hơnong pơkă đĭ rơnoh sĭ mơdrô dua bơnah truh pơ 25 klai đôlar Mi. Khua git gai pơ ala mơnuih ƀôn sang dêh čar ta rơkâo Khua pơ ala mơnuih ƀôn sang dêh čar Thái Lan tŏ tui ngă gêh gal brơi mơnuih ƀon sang Việt Nam ƀơi Thái Lan hăng dong yua pơđĭ kyar gru grua Việt Nam ƀơi Thái Lan jing akŏ phun pơtrut kơtang pơbưp nao rai mơnuih ƀon sang dua bơnah.