VOV4.Jarai - Ngă tui jơlan hơdră ngă bruă mơng Ping gah Ƀirô khua pơ ala mơnuih ƀon sang dêh čar thun 2022, tlam lơ 29/3, ƀơi sang bruă Khua git gai pơ ala mơnuih ƀon sang, Khua git gai Ping gah ƀirô khua pơ ala mơnuih ƀon sang dêh čar, Khua git gai pơ ala mơnuih ƀon sang dêh čar ơi Vương Đình Huệ git gai jơnum ngă bruă mơng Ping gah Ƀirô khua git gai pơ ala mơnuih ƀon sang hăng Khul apăn bruă git gai Ping gah tơring čar Khánh Hòa. Ƀơi mông ngă bruă, Ping gah Ƀirô khua git gai pơ ala mơnuih ƀon sang hơmâo hmư̆ Khul apăn bruă git gai Ping gah Khánh Hòa lăi pơthâo bruă ngă tui Tơlơi pơtrun mrô 09 lơ 28/1 mơng Ding jum Kơđi čar kơ bruă man pơdong, pơđĭ kyar tơring čar Khánh Hòa 2030, lăng nao truh pơ thun 2045 hăng ngă tui hơdôm tơlơi pơtrun jơnum mơng Ƀirô khua git gai pơ ala mơnuih ƀon sang kơ bơwih ƀong - mơnuih mơnam ƀơi tơring čar Khánh Hòa. Tơlơi pơtrun mơng Ding jum kơđi čar ba tơbiă 10 mơta bruă kiăng ngă, phun ñu lĕ akŏ pơdong Khánh Hoà truh thun 2030 jing ƀon prong, kiăo tui tơlơi hơmâo tơlơi gêh gal gah ia rơsĭ, jing plơi prong rơgơi, pơđĭ kyar hơđong kơjăp, hơmâo gru grua đưm laih anun pơtruh nao rai hăng jar kmar; jing tơlơi pơtrut đĭ kyar, kual prong mơng kual ter hang ia rơsĭ hăng Dơnung tong krah, Dap Kơdư hăng amăng dêh čar ta kơ tơlơi bơwih ƀong gah ia rơsĭ. Ƀơi mông ngă bruă, ƀing khua hơmâo pơgôp hiăp ba tơbiă hơdră pơtrut đĭ kyar tơring čar Khánh Hòa, biă ñu lĕ pơkra tơlơi phiăn, hơdră djru phara đah mơng dưi ngă hơdôm bruă jao, pơdong tơring čar Khánh Hòa truh thun 2030, lăng nao pơ thun 2045.

Siu H’Mai: Pơblang