VOV4.Jarai - Mơguah lơ 16/5, Ƀơi Ƀirô mă bruă, Khua git gai pơ ala mơnuih ƀon sang dêh čar Lao ơi Kaysone Phomvihane pơphun mông čơkă sit nik Khua git gai pơ ala mơnuih ƀon sang dêh čar ơi Vương Đình Huệ. Amăng mông čơkă dua čô khua hơmâo pơphun jơnum bơkơtuai. Dua čô khua lăi pơtong, ƀơi anăp kơ tơlơi tơnap tap ră anai amăng jar kmar hăng amăng kual, dua bơnah jai hrơi ƀuh rơđah tơlơi yôm mơng bruă pơtrut pơsur tơlơi rô nao rai dua boh dêh čar ha guai jai hrơi kjăp, giang mah pơhlôm brơi bruă pơgang rơnuk rơnua hăng pơđĭ kyar kơplah wah Việt Nam hăng Lai, lăng anai lĕ phiăn juăt kiăng pơđĭ kyar, tơlơi yôm hloh hăng lĕ sa amăng hơdôm tơlơi kiăng pơhlôm brơi tơlơi dưi amăng bruă ngă hơkrŭ amăng rĭm boh dêh čar. Kơ hơdră gum hrŏm pơ anăp anai, dua bơnah kiăng pơtrun pơlăi nao rai, jơnum pơbưp kơplah wah Khua mua mơng Jơnum min apăn bruă Khua pơ ala mơnuih ƀon sang dêh čar dua bơnah, ƀing khua mua djru pơtrut ngă giang mah, Grup khua mua pơ ala mơnuih ƀon sang lĕ đah kơmơi, Grup khua mua hlăk ai, kơplah wah grup khua Khua pơ ala mơnuih ƀon sang dêh čar hăng Khul pơ ala mơnuih ƀon sang gưl tơring čar mơng dua bơnah; gum hrŏm pơphun hơdôm tal jơnum pơƀut, bơkơtuai, pơlăi nao rai hơdôm tơlơi găn rơgao amăng djop mơta bruă amăng Ƀirô Khua pơ ala mơnuih ƀon sang dêh čar.

Siu Đoan: Pơblang