VOV4.Jarai - Tŏ tui hơdôm hrơi nao mă bruă ƀơi hơdôm tơring čar kual Dơnung tong krah, mơguah lơ 27/7, Khua git gai pơ ala mơnuih ƀon sang dêh čar ơi Vương Đình Huệ hăng grup hyu mă bruă hơmâo mông mă bruă hăng Khul apăn bruă Ping gah tơring čar Quảng Nam. Khua git gai pơ ala mơnuih ƀon sang dêh čar ơi Vương Đình Huệ brơi thâo, mơng sa boh tơring čar ngă đang hmua, Quảng Nam hơmâo hrưn đĭ jing sa boh tơring čar glăk pơđĭ kyar amăng kual, bruă bơwih ƀong huă jai hrơi pok prong, anai lĕ 1 amăng 16 boh tơring čar, ƀôn prong hơmâo kah pha mă yua ngăn drăp mơng gơnong glông hăng anai lĕ kơnong tơring čar amăng đơ đam dêh čar hơmâo kual bơwih ƀong huă pok phư, bơwih ƀong ter hang ia rơsĭ hăng hơmâo bah amăng jang.

Bruă bơwih brơi tơlơi hơdip mơnuih mơnam, djru brơi mơnuih ƀon sang hơmâo pơhlôm, biă mă ñu hơdôm sang anŏ kơnuk kơna čem rông ba, mơnuih djru hơkrŭ hơmâo rơbêh 23% mrô mơnuih amăng đơ đam tơring čar. Pơ anăp anai, Khua git gai pơ ala mơnuih ƀon sang dêh čar ơi Vương Đình Huệ rơkâo, tơring čar tŏ tui pel ĕp hơdôm jơlan hơdră bruă mă pok pơhai ngă tui hơdôm tơlơi pơtrun mơng gơnong glông, mơng tơring čar; pơjing hơdôm akŏ bruă tong ten kiăng kơ ngă tui; pơjing hơbô̆ bruă ba gru amăng pơđĭ kyar bơwih brơi tuai čuă ngui, hơkrŭ glăi amăng bơwih brơi tuai čuă ngui tơdơi kơ abih klin, ngă gêh gal, pơhlôm bruă bơwih bowang, gơnam brơi tuai čuă ngui kiăng kơ hrưn đĭ kơtang; pơtrut 3 jơlan hơdră tui hơnong pơkă gưl dêh čar.

Siu Đoan: Pơblang