VOV4.Jarai - Tlam mơmot lơ 24/1, ƀrô hrơi prăp rơmet čơkă tê̆t Nhâm Dần 2022, Khua git gai pơ ala mơnuih ƀon sang dêh čar ơi Vương Đình Huệ hăng Grup khua mua Ping gah nao pơhmư̆ Jơlan hơdră “Bơyan bơnga tơhan pơgang guai pơđao pran jua mơnuih ƀon sang ƀơi kual ia rơsĭ” ƀơi Puih kơđông tơhan Rạch Gốc, tơring glông Ngọc Hiển, tơring čar Cà Mau. Pơhiăp ƀơi mông pơhmư̆ jơlan hơdră ngui ngor, Khua git gai pơ ala mơnuih ƀon sang dêh čar ơi Vương Đình Huệ hok mơ-ak yua dah, mah dŏ tơnap samơ̆ ƀing khua, ling tơhan pơgang guai Cà Mau lăi hrŏm, Puih kơđông pơgang guai Rạch Gốc lăi hơjăn, lêng kơjăp pran jua ngă bruă, gum pơgôp ha pran, pok pơhai ngă bruă djơ̆ hrŏm, thâo kơjăp bruă pơgang guai, pơgang ba kual ia rơsĭ, bul pơtâo amăng tơring čar. Khua git gai pơ ala mơnuih ƀon sang dêh čar ơi Vương Đình Huệ lăi, biă ñu amăng hrơi Tê̆t Nhâm Dần anai, ƀing khua, ling tơhan hơdôm puih kơđông tơhan pơgang guai Cà Mau hơmâo ngă hrŏm hăng ping gah, gong gai, djru ba Tê̆t kơ mơnuih ƀon sang hơdôm să ter hang ia rơsĭ; lăng ba sang anŏ hơkrŭ lŏn ia, sang anŏ juăt ƀong prăk blan kơnuk kơna djru, sang anŏ rin, čơđai sang hră ƀơi anai hơmâo čơkă thun phrâo trơi pơđao yâo mơ-ak.

Ƀơi mông ngui ngor, Khua git gai pơ ala mơnuih ƀon sang dêh čar Vương Đình Huệ hăng ƀing khua Ping gah hơmâo brơi 750 anung gơnam kơ Puih kơđông tơhan pơgang guai Rạch Gốc, tơhan glăk pơgang klin, sang anŏ hơmâo kơnuk kơna djru, sang anŏ rin, sang anŏ tơnap tap ƀơi tơring glông Ngọc Hiển.

Hlâo kơ anun, Khua git gai pơ ala mơnuih ƀôn sang dêh čar ơi Vương Đình Huệ nao čuă, pơpŭ thun phrâo ƀing khua mua, ling tơhan blah ngă Tiểu đoàn U minh 2 hăng mơnuih mut phung mă bruă apah dŏ ƀơi să Phong Điền, tơring glông Trần Văn Thời, tơring čar Cà Mau. Tiểu đoàn U Minh 2 lĕ puih kơđông tơhan blah ngă beč bal tơring čar Cà Mau, puih kơđông tơhan blah ngă hăng tơhan plơi hơmâo mơ̆ng rơnuk hơkrŭ blah ayăt Mi đưm, blah ngă wai pơgang treng hang ia rơsĭ dêh čar ta gah rơnuč dơnung yŭ laih anun ngă bruă djru jar kmar gơyut dêh čar Kur.

Đĭ pơhiăp amăng mông jơnum hăng khua mua Tiểu đoàn U minh 2, Khua git gai pơ ala mơnuih ƀôn sang dêh čar ơi Vương Đình Huệ bơni kơ boh tơhnal mơ̆ puih kơđông tơhan anai dưi ngă laih, čang rơmang pơ anăp, ƀing khua mua, ling tơhan blah ngă ăt djă bong na nao tơlơi khin hơtai bruă hơkrŭ, ba jơlan hlâo, ngă giong bruă ping gah, kơnuk kơna hăng mơnuih ƀôn sang jao hăng đăo kơnang.

Siu H’Mai-Nay Jek: Pơblang