VOV4.Jarai - Mông pioh pơpŭ kơ grup đă boh lông đah kơmơi Việt Nam pơphun amăng mơguah lơ 11/2, Khua git gai pơ ala mơnuih ƀon sang dêh čar ơi Vương Đình Huệ hơmâo mơ-it gơnam tết brơi nai pơtô đă boh lông ơi Mai Đức Chung hăng pơpŭ tơlơi dưi prong mơng grup đă boh lông đah kơmơi Việt Nam. Amăng hơdôm hrơi laih rơgao, ƀing kha mua pơprong mơng Ping gah, Kơnuk kơna, Khua pơ ala mơnuih ƀon sang dêh čar  hơmâo tơlơi đing nao, hok mơ-ak hăng hơdôm tơlơi dưi mơng Grup đă boh lông đah kơmơi Việt Nam. Hăng tơlơi gir run abih pran jua, nai pơtô Mai Đức Chung hrŏm hăng grup đă boh lông hơmâo găn rơgao tơlơi glêh tơnap hloh kiăng tal blung a ba grup đă boh lông dưi mut đă World Cup thun 2023. Tơlơi dưi mơng grup đă boh lông amăng lơ 1 tết hăng tŏ tui lĕ tơlơi dưi mơng grup đah kơmơi amăng tal pơplông Asian Cup 2022 hơmâo lar hyu pran kơtang tơl abih bang mơnuih hor lăng đă boh lông amăng dêh čar Việt Nam.

Siu Đoan: Pơblang