VOV4.Jarai-Tlam lơ 14/6, Khua git gai pơ ala mơnuih ƀôn sang dêh čar ta ơi Vương Đình Huệ, tŭ jum khua anih jưh pơ ala dêh čar New Zealand yă Tredene Cherie Dobson. Khua git gai pơ ala mơnuih ƀôn sang dêh čar ta pơdah pran jua hok mơak ƀuh tơlơi pơđĭ kyar klă hiam giăng mah ngă hrom Việt Nam hăng New Zealand thun blan rơgao. Ƀrô djơ̆ tal anai, Khua git gai pơ ala mơnuih ƀôn sang dêh čar ta ơi Vương Đình Huệ bơni kơ kơnuk kơna dêh čar New Zealand lơ̆m mông tơnap tap ăt djru kơ Việt Nam amăng bruă pơhlôm, pơgang klin Covid 19 hăng hrơi blan rŭ glăi pơđĭ kyar bơwih ƀong huă.

Khua mua pơ ala mơnuih ƀôn sang Việt Nam bơni kơnuk kơna, mơnuih ƀôn sang dêh čar New Zealand gleng nao djru ba yôm pơphăn amăng rơnoh prăk ODA pioh kơ Việt Nam ngă tui djơ̆ hơdôm tơhnal pơkă pơđĭ kyar hơđong kjăp, pơtum nao amăng bruă gah dêh čar New Zealand hơmâo tơlơi gêh găl laih anun Việt Nam hơmâo tơlơi kiăng kah hăng bruă ngă hmua, pơđĭ kyar plơi pla, pơtô hrăm, pơđĭ kyar mơnuih mă bruă, wai lăng hăng bong glăi tơlơi truh lŏn adai ngă, anŏ pơblih ayuh hyiăng lŏn adai hăng pơhrŏ tơlơi ƀun rin.

Nay Jek: Pơblang