VOV4.Jarai - Tlam mơmot lơ 7/9, ƀơi sang bruă pơ ala mơnuih ƀon sang, ơi Vương Đình Huệ, Khua git gai pơ ala mơnuih ƀon sang dêh čar hơmâo tŭ jum khua mua Anom bruă jŭ yap Prăk Kơnuk kơna Lao yua ơi Viengthavisone Thephachanh, Khua Jŭ yap prăk kơnuk kơna Lao ba jơlan rai čuă hăng mă bruă ƀơi dêh čar ta. Ƀơi mông bưp, ơi Vương Đình Huệ bơni biă kơ anom bruă jŭ yap prăk kăk kơnuk kơna dua bơnah hơmâo mông jơnum truh kih, brơi thâo hrŏm hăng tơlơi rô nao rai yôm pơphăn hơmâo sa ƀu hơmâo dong tah dua mơng Việt Nam hăng Lao, anom bruă jŭ yap prăk kăk dua kơnuk kơna hơmâo tơlơi ngă hrŏm djru nao rai tơdruă kơjăp biă hluai tui tơlơi dưm kơnar kơ bruă pơphun.

Hrơi tŭ jum khua mua

Khua git gai pơ ala mơnuih ƀon sang dêh čar čang rơmang dua anom bruă pơ ala mơnuih ƀon sang dêh čar amra bơlăi nao rai tơlơi thâo rơgơi pơphun bruă mă mơng anom bruă jŭ yap prăk, pơhlôm dưi wai lăng mă hơjăn, pơtrut đĭ tơlơi gơgrong bruă mơng anom bruă hơduah ĕp kơđi prăk kăk, dram gơnam kơnuk kơna laih anun gơgrong bruă hăng Ping gah, mơnuih ƀon sang.

Siu H’Mai: Pơblang