VOV4.Jarai - Tlam mơmŏt tom brơi (30/5), ƀơi Ƀirô mă bruă, Khua git gai pơ ala mơnuih ƀon sang dêh čar ơi Vương Đình Huệ tŭ jum Khua sang anih jưh pơ ala dêh čar Angle ƀơi Việt nam Gareth Ward. Amăng mông bưp, Khua git gai pơ ala mơnuih ƀon sang dêh čar ơi Vương Đình Huệ lăng yôm bruă pơđĭ kuar hiam klă tơlơi rô nao rai ngă hrŏm dua bơnah Ƀirô Khua pơ ala mơnuih ƀon sang dêh čar Việt Nam - Angle amăng thun blan laih rơgao.

Dua bơnah hơmâo pơphun na nao mông jơnum pơƀut khua mua djop gưl, tŏ tui bruă pơbưp, pơlăi nao rai amăng hơdôm mông jơnum djop bơnah, sit biă ñu amăng Khul pơlir hơbit Khua pơ ala mơnuih ƀon sang jar kmar (IPU), Jơnum ngă hrŏm Ƀirô Khua pơ ala mơnuih ƀon sang kual Asia - Mi kô̆ (ASEP). Pơsit tong bruă ngă hrŏm tŭ yua kơplah wah dua bơnah lĕ tơlơi yôm phun kiăng pơtrut tơlơi rô nao rai ngă hrŏm pơ anăp kơplah wah Việt Nam - Angle, ơi Vương Đình Huệ čang rơmang, Khua anih jưh Gareth Ward tŏ tui ngă gong jơlan kiăng pơtrut rô nao rai dua bơnah, rơkâo djru hrŏm anăp nao pioh hơdor glăi 50 thun akŏ pơjing bruă pơtom hiăp kơplah wah dua bơnah amăng thun 2023.

Siu Đoan: Pơblang