VOV4.Jarai - Lơ 19/7, ƀơi Ƀirô mă bruă, Khua git gai pơ ala mơnuih ƀon sang dêh čar ơi Vương Đình Huệ tŭ jum Khua anom bruă git gai Sang bruă prăk jar kmar (WB) Axel van Trotsenburg, ƀrô tal rai čuă dêh čar Việt Nam dong mơng lơ 17-19/7. Khua pơ ala mơnuih ƀon sang dêh čar ơi Vương Đình Huệ lăi pơtong, WB lĕ sa amăng hơdôm anom ngă hrŏm yôm phăn hăng đăo gơnang djru brơi prong prin kiăng dêh čar Việt Nam ngă tui hơdôm hơnong pơkă amăng pơđĭ kyar hơđong.

Khua git gai pơ ala mơnuih ƀon sang dêh čar ơi Vương Đình Huệ tŭ jum Khua WB

Amăng mông jơnum COP26, Việt Nam hơmâo tơlơi ƀuăn kơtang hloh truh thun 2050 pơgăn hyuh hơƀak jrăk dŏ 0. Anai lĕ tơlơi ƀuăn bơkơnar hăng hơdôm boh dêh čar kual Mi kô̆, pơdah pran gir run prong hloh hăng tơlơi gơgrong mơng Việt Nam hăng jar kmar.

Khua WB brơi thâo, WB đĭ dong 50% mrô prăk tui tơlơi ƀuăn ngă hrŏm hăng hơdôm dêh čar rơwang tơdơi kơ abih klin Covid-19 đĭ 200 klai đôlar Mi. Tơlơi gum djru anai kiăng hơdôm dêh čar pơgang hĭ hơdôm tơlơi rung răng, laih dong tơlơi anăp nao sui thun, anăp nao hơnong pơkă pơđĭ kyar sui thun hăng hơđong kjăp.

Siu Đoan: Pơblang