VOV4.Jarai-Tlam mơmŏt lơ 12/5, Khua git gai pơ ala mơnuih ƀôn sang dêh čar ta ơi Vương Đình Huệ tŭ jum nai tha prin nai prin tha ơi Vieng Thoong Sỉ Phan Đol, Khua sang phat kơđi dêh čar Lao rai čuă jơmư sit nik dêh čar Việt Nam. Khua git gai pơ ala mơnuih ƀôn sang dêh čar ta lăi pơtong, tal rai čuă jơmư anai yômbiă mă lơ̆m dua bơnah dêh čar hlăk prăp lui hơdor glăi hrơi akŏ pơjing bruă pơtom hiăp laih anun kĭ pơkôl ngă giăng mah laih anun gum hrom amăng bruă mă Việt Nam-Lao.

Hơdôm bruă pơtom hiăp čuă jơmư nao rai dua bơnah dêh čar hlăk pok pơhai klă hiam; laih dơ̆ng čang rơmang amăng bruă mă phrâo, Khua sang phat kơđi dêh čar Lao amra ngă giong bruă jao, pơtrut tui bruă ngă pŭ ƀăn giăng mah kjăp hloh kơ dua bơnah dêh čar. Khua git gai pơ ala mơnuih ƀôn sang dêh čar čang rơmang, sang phat kơđi dua bơnah pơđĭ tui na nao boh tơhnal dưi ngă laih, ƀu pơdơi ôh bruă ngă hrom pơ anăp anai kiăng ba glăi boh tŭ yua lu hloh.

Ơi Vương Đình Huệ, hăng bruă mă mơ̆ng ñu, dong yua laih anun pơtrut pioh kơ dua bơnah anom bruă sang phat kơđi dêh čar kơtưn ngă hrom lu bruă mă amăng thun blan pơ anăp adih.

Nay Jek: Pơblang