VOV4.Jarai - Tlam lơ 29/7, Khua git gai pơ ala mơnuih ƀon sang dêh čar ơi Vương Đình Huệ tŭ jum Khua djru bruă yôm phăn Khul pơlir khua mua ngă giang mah Japan - Việt Nam Takebe Tsutomu. Ơi Vương Đình Huệ lăng yôm pran gơgrong mơng Khua djru bruă yôm phăn khul pơlir khua mua ngă giang mah Japan - Việt Nam Takebe Tsutomu amăng bruă kơtưn tơlơi rô nao rai ngă hrŏm kơplah wah dua boh dêh čar lăi hrŏm hăng kơplah wah dua boh anom bruă phaih phiăn dua boh dêh čar hnun mơn.

Mông pơbưp

Khua git gai pơ ala mơnuih ƀon sang dêh čar ơi Vương Đình Huệ lăng yôm bruă man pơdong Sang hră gưl prong Việt Nam - Japan gah Sang hră gưl prong Hà Nội; čang rơmang Sang hră gưl prong Việt Nam - Japan amra ba jơlan hlâo, pơdah tơlơi yôm mơng tơlơi rô nao rai dua bơnah. Khua git gai pơ ala mơnuih ƀon sang dêh čar lăng yôm bruă Ding jum phaih phiăn Japan hơmâo pơplih Tơlơi pơkă kơ čơđai sang hră Việt Nam kiăo tui hrăm pơ Japan; čang rơmang dua bơnah tŏ tui ngă hrŏm kiăng kơ klă dong tui hơdră ngă hrŏm anai; laih dong kơsem min kiăng pơtrut ngă hrŏm gah mơnuih bruă mă pơ anăp anai.

Siu Đoan: Pơblang