VOV4.Jarai - Tlam mơmŏt lơ 23/8, ƀơi Ƀirô mă bruă, Khua git gai pơ ala mơnuih ƀon sang dêh čar ơi Vương Đình Huệ tŭ jum Khul hlăk ai, Ping gah Dân chủ tự do Japan nao čuă mă bruă ƀơi Việt Nam. Khua git gai pơ ala mơnuih ƀon sang dêh čar ơi Vương Đình Huệ hơ-ơč hmưi Ping gah Dân chủ tự do Japan phrâo hơmâo tơlơi dưi prong amăng tal plĕ hră amăng Ƀirô Khua pơ ala mơnuih ƀon sang gơnong glông dêh čar blan 7 laih rơgao. Lăng yôm pran gơgrong mơng hlăk ai, ƀing khua pơ ala mơnuih ƀon sang thun dŏ hlăk ai amăng bruă pơđĭ kyar tơlơi rô nao rai Việt Nam - Japan, Khua pơ ala mơnuih ƀon sang dêh čar pơsit tong, Ƀirô Khua pơ ala mơnuih ƀon sang dêh čar Việt Nam dong yua bruă kơtưn tơlơi rô nao rai kơplah wah khul hlăk ai dua bơnah kah hăng ƀing khua pơ ala mơnuih ƀon sang thun dŏ hlăk ai dua bơnah. Khua git gai pơ ala mơnuih ƀon sang dêh čar rơkâo ƀing khua pơ ala mơnuih ƀon sang amăng Khul hlăk ai Ping gah LDP Japan tŏ tui đing nao mơnuih ƀon sang Việt Nam dŏ hơdip pơ Japan, đing nao dong hơdôm hơdră djru, ngă hrŏm amăng bruă mă kơplah wah dua bơnah, ngă gêh gal kiăng mơnuih mă bruă Việt Nam dưi nao mă bruă pơ Japan. Hrŏm hăng anun, hlăk ai dua bơnah amra pơphun Festival hlăk ai, čơđai hrăm hră gưl prong tui tơđar, sit biă ñu amăng thun 2023 lơ̆m dua bơnah hơdor glăi 50 thun akŏ pơjing bruă pơtom hiăp; ƀing khua mua thun dŏ hlăk ai dua bơnah kiăng kơtưn pơbưp nao rai,  pơlăi nao rai tơlơi găn rơgao bruă mă, kah hăng hơdôm bruă dua bơnah đing nao.

Siu Đoan: Pơblang