Khua git gai pơ ala mơnuih ƀon sang dêh čar ơi Vương Đình Huệ pơsit tong tal nao čuă anai mơng khua mua Việt Nam kiăng pơtrut hăng ngă dơlăm tui tơlơi rô nao rai ngă hrŏm kơplah wah Việt Nam - New Zealand. Amăng mông jơnum, dua bơnah tŭ ư hăng bruă kơtưn dong ngă hrŏm bơwih ƀong huă-sĭ mơdrô-tuh pơ alin, ba bruă anai jing bruă pơtrut pơđĭ kyar tui tơlơi rô nao rai dua bơnah.

Dua čô khua lăng yôm tơlơi rô nao rai ngă hrŏm kơplah wah anom bruă čih pơkra tơlơi phiăn, pơsit tong tơlơi gơgrong yôm phăn, sit nik mơng bruă ngă hrŏm kơplah wah Ƀirô Khua pơ ala mơnuih ƀon sang dêh čar amăng pơtruh tơlơi rô nao rai dua boh dêh čar. Dua bơnah tŭ ư kơsem min pơjing sa tơlơi pơkôl ngă hrŏm kơplah wah dua Ƀirô Khua pơ ala mơnuih ƀon sang dêh čar kiăng hơmâo tơlơi pơkă brơi dua bơnah pơtrut hăng ngă dơlăm tui tơlơi rô nao rai ngă hrŏm pơ anăp anai.