VOV4.Jarai - Mơguah lơ 18/5, ƀơi sang bruă pơ ala mơnuih ƀon sang, Khua git gai pơ ala mơnuih ƀon sang ơi Vương Đình Huệ bưp Khua mir sir dêh čar Grek. Khua git gai pơ ala mơnuih ƀon sang dêh čar ơi Vương Đình Huệ hok mơ-ak lơ̆m ƀuh tơlơi rô nao rai hăng ngă hrŏm amăng lu mơta bruă mơng dua bơnah amăng hrơi blan rơgao pơđĭ kyar, hơkrŭ tui na nao, pơdah hăng bruă jơnum pơbưp khua mua djŏp gưl, biă ñu khua mua prong dua boh dêh čar. Tơlơi rô nao rai bơwih ƀong - sĭ mơdrô đĭ kyar, biă ñu mơng hrơi Hră pơkôl EVFTA hơmâo ngă.

Khua git gai pơ ala mơnuih ƀon sang kiăng dua bơnah pơtrut tui ngă hrŏm amăng hơdôm bruă dêh čar Grek dưi ngă hăng Việt Nam kiăng kah hăng bơwih ƀong gah ia rơsĭ, pơkra song nan, ƀat tô, tơdrun hyu čuă ngui, laih dong tañ pơsit, kĭ pơkôl hră bĕ hĭ mă jia dua wơ̆t hăng hră pơkôl ba hyu gơnam pơ ia rơsĭ đah mơng djru nao rai pơđĭ kyar bơwih ƀong sĭ mơdrô.

Siu H’Mai: Pơblang