Khua git gai pơ ala mơnuih ƀôn sang dêh čar lăng yôm bruă Ding jum ia jrao hơmâo đing nao pơphô bruă brơi kơnuk kơna mơ-it nao Ƀirô Khua pơ ala mơnuih ƀôn sang dêh čar čih pơkra tơlơi phiăn khăm pơjrao (čih pơkra glăi). Anai lĕ hơdôm tơlơi akŏ phun kiăng pơđĭ kyar gơnong bruă ia jrao, pơhlôm tơlơi phiăn ngă gêh gal, klă hloh brơi hơdôm anom bruă khăm pơjrao. Tơlơi anai pơsit tong tơlơi gir run mơng Ƀirô Khua pơ ala mơnuih ƀôn sang dêh čar hăng Kơnuk kơna amăng bruă čih pơkra, pơgiong hăng mă yua tơlơi phiăn.

Pơ anăp anai, Khua git gai pơ ala mơnuih ƀôn sang dêh čar Vương Đình Huệ rơkâo: Gơnong bruă ia jrao tŏ tui hruă kjăp djop mơta tui tơlơi gơgrong mơng gơnong bruă ia jrao, tui tơlơi pơtă mơng Wa Hô, tui hơdôm tơlơi pơtrun mơng Ping gah brơi gơnong bruă ia jrao. Tơlơi pơtrun mrô 20 hơmâo pơsit gơnong bruă ia jrao Việt Nam yua boh thâo phrâo, djuai ania hăng abih bang, hăng hơnong pơkă prong hloh lĕ pơhlôm brơi tơlơi suaih pral hăng tơlơi hơdip mơda brơi mơnuih ƀôn sang.