VOV4.Jarai - Tlam lơ 12/9, Khua git gai pơ ala mơnuih ƀon sang dêh čar ơi Vương Đình Huệ hơmâo mông bưp hăng bơkơtuai hrŏm Khua git gai pơ ala mơnuih ƀon sang dêh čar Kur, ơi Samdech Heng Samrin rai čuă sit nik dêh čar Việt Nam. Khua git gai pơ ala mơnuih ƀon sang dêh čar ta ơi Vương Đình Huệ pơsit, Việt Nam lêng lăng yôm hăng djru brơi hlâo bruă rô nao rai “dêh čar ieo gah klă hiam, ngă hrŏm abih bang, hơđong kơjăp sui thun” hăng dêh čar Kur, ăt kah hăng tơlơi gum pơgôp 3 boh dêh čar kual Đông Dương.

Ơi Vương Đình Huệ tŭ jum Khua git gai pơ ala mơnuih ƀon sang Kur Samdech Heng Samrin

Khua git gai pơ ala mơnuih ƀon sang ơi Vương Đình Huệ lăi, kiăng rŭ glăi hăng pơđĭ kyar tơlơi bơwih ƀong huă - mơnuih mơnam, dua bơnah kiăng tañ kĭ pơkôl hră sĭ mơdrô gah guai dêh čar; ngă tui tŭ yua Hră čih pioh bruă pơđĭ kyar hăng pơtruh nao rai anih sĭ mơdrô gah guai dêh čar; pơphun ngă tŭ yua Hră kĭ pơkôl pơtrut pơsur hăng Pơgang ba tuh pơ plai hăng Hră kĭ pơkôl bĕ mă jia dua wơ̆t. Khua git gai pơ ala mơnuih ƀon sang  dua boh dêh čar gum hrŏm ngă amuñ, gêh gal brơi hloh kơ hơdôm anom bơwih ƀong. Việt Nam amra pơtrut pơsur hơdôm anom bơwih ƀong tuh pơ plai pơ dêh čar Kur.

Siu H’ Mai: Pơblang