VOV4.Jarai - Amăng tal nao čuă sit nik dêh čar Anglê, lơ 30.6, Khua git gai pơ ala mơnuih ƀon sang dêh čar ơi Vương Đình Huệ hơmâo nao pơhmư̆ mông Jơnum ngă hrŏm bruă pơtô hrăm Việt Nam - Anglê. pơhiăp ƀơi mông jơnum, ơi Vương Đình Huệ lăi, pơtô hrăm jing bruă yôm phun ƀơi Việt Nam, pơđĭ kyar pơtô hrăm hơmâo pơsit jing sa amăng 3 mơta bruă pơplih phrâo kiăng ngă amăng Jơlan hơdră pơđĭ kyar bơwih ƀong huă - mơnuih mơnam mơng Việt Nam.

Khua git gai pơ ala mơnuih ƀon sang Vương Đình Huệ pơhiăp ƀơi mông jơnum

Jơnum kơ bruă pơtô hrăm, ƀơi anŏ ñu prong hloh kơ bruă sĭ mơdrô, bơwih ƀong, tuh pơ plai. Khua git gai pơ ala mơnuih ƀon sang dêh čar čang rơmang, dua bơnah kiăng lăng ba hloh amăng hơdôm bruă kah hăng:Kơnuk kơna Anglê djru ba dong kơ bruă pơtô hrăm tơlơi Anglê ƀơi Việt Nam, pơđĭ tui prăk djru kơ čơđai sang hră gưl prong Việt Nam; pơđĭ tui jơlan hơdră pơtô hrăm ngă hrŏm hăng hơdôm boh sang hră gưl prong hmư̆ hing mơng Anglê, amăng anun lăng nao bruă boh thâo ia rơgơi, măi mok hăng pơtô pơjuăt nai prin tha.

Siu H’Mai: Pơblang