VOV4.Jarai - Tlam lơ 20/3, ƀơi ƀon prong Hồ Chí Minh, Khua git gai pơ ala mơnuih ƀon sang dêh čar ơi Vương Đình Huệ ngă bruă hăng Khul apăn bruă git gai Ping gah ƀon prong Hồ Chí Minh kơ bruă git gai, črâo bruă hăng boh than ba glăi mơng Akŏ bruă pơđĭ kyar bơwih ƀong huă - mơnuih mơnam ƀon prong Hồ Chí Minh thun 2021, bruă mă yôm phun amăng thun 2022; boh than ngă tui Tơlơi pơtrun mrô 54 mơng Ƀirô khua git gai pơ ala mơnuih ƀon sang kơ ngă lăng hlâo tơlơi phiăn, hơdră djru phara pioh pơđĭ kyar ƀon prong Hồ Chí Minh.

Kơ hơdră ngă bruă amăng hrơi blan pơ anăp, Khua git gai pơ ala mơnuih ƀon sang ơi Vương Đình Huệ pơtă kơ khua mua ƀon prong Hồ Chí Minh kiăng pơtrut akŏ pơdong, pơplih ming tơlơi mă bruă mơng Ping gah hăng anom bruă čar mă bruă klă, hơđong kơjăp; akŏ pơdong grup mă bruă rơnôm, thâo gum pơgôp, gum hrŏm ha pran jua. Pơƀut bruă čih pơkra tơlơi phiăn, kiăo tui djơ̆ hăng Tơlơi pơtrun Jơnum ping gah dêh čar tal 13 hăng Tơlơi pơtrun Jơnum ruah khua ping gah ƀon prong tal 11, lăng glăi abih jơlan hơdră ngă bruă, tañ hơmâo hơdră pơđĭ kyar bơwih ƀong huă - mơnuih mơnam, hơdôm tơlơi gơñăm nao, bruă kiăng ngă đah mơng pơplih glăi, pơhrua tui pơhlôm lăp djơ̆, dưi ngă.

Siu H’Mai: Pơblang