VOV4.Jarai-Tom brơi, lơ 15/5, Khua git gai pơ ala mơnuih ƀôn sang dêh čar ơi Vương Đình Huệ hăng grup khua mua mơ̆ng sang bruă pơ ala mơnuih ƀôn sang dêh čar nao truh laih pơ tơdron rơdêh por Wattay, plơi prong jưh jom Viêntian dêh čar Lao, čuă jơmư sit nik dêh čar Lao.

Tal nao čuă mơ̆ng ơi Vương Đình Huệ gah dêh čar Lao lăng kah hăng sa bruă mă yôm biă mă amăng thun gum pơgôp giăng mah adơi ayong Việt Nam-Lao, Lào -Việt Nam thun 2022; pơtrut kơtang bruă ngă giăng mah rô nao rai hăng Việt Nam pioh pơtrut ngă tui truh kih akŏ bruă pơđĭ kyar bơwih ƀong huă mơnuih mơnam 5 thun tal IX mơ̆ng dêh čar Lao; kơtưn ngă hrom djru tơdruă amăng bruă bong glăi klin kheng hăng rŭ glăi tơlơi bơwih ƀong huă mơnuih mơnam tơdơi kơ klin kheng abih; hơduah ĕp tơlơi thâo thăi amăng bruă mă gah anom bruă khua pơ ala mơnuih ƀôn sang Việt Nam.

Tơdơi kơ nao truh pơ dêh čar Lao, ơi Vương Đình Huệ nao jơnum ngă lơphet tơgŭ mă bruă man pơdong Đang bơnga giăng mah Lào-Việt Nam; bưp mơnuih ngă bruă sĭ mơdrô mơ̆ng Việt Nam tuh pơ alin ƀơi dêh čar Lao; nao čuă sang bruă khua anih jưh pơ ala hăng bưp mơnuih ƀôn sang Việt Nam ƀơi dêh čar Lao.

Nay Jek: Pơblang