VOV4.Jarai - Ƀrô hrơi ngă lơphet 75 thun Hrơi pioh kơ tơhan rơka - Tơhan djai pơsăn drơi, amăng bruă hyu čuă jơmư hơdôm boh tơring čar kual Tong Krah, mơguah lơ 26/7, Khua git gai pơ ala mơnuih ƀon sang dêh čar ơi Vương Đình Huệ hơmâo nao dưm bơnga, tŭi ñang hơ-ŭ pơ Pơsat tơhan djai pơsăn drơi plơi prong Quảng Ngãi; tŭi ñang, dưm bơnga ƀơi Anih djă pioh gơnam đưm mơng rơgŏm ơi Phạm Văn Đồng - Khua dêh čar hơđăp; nao čuă, ƀơk gơnam kơ Amĭ Việt Nam sông kơtang, sang anŏ gum hơkrŭ lŏn ia ta. Ƀơi pơsat tơhan plơi prong Quảng Ngãi, Khua git gai pơ ala mơnuih ƀon sang dêh čar ơi Vương Đình Huệ hăng grup mă bruă hơmâo nao čuă, kŭp akŏ hơ-ŭ ƀơi gong kut tơhan, ƀơi anăp bơngăt bơnguai tơhan djai pơsăn drơi, mơnuih rơgơi mơbruă mơng plơi pla, lŏn ia, hơdor kơ ling tơhan khin hơtai, djai yua tơlơi rơngai lŏn ia. Hlâo kơ anun, Khua git gai pơ ala mơnuih ƀon sang ơi Vương Đình Huệ hăng grup khua hơmâo nao čuă, brơi gơnam kơ sang anŏ Amĭ Việt Nam sông kơtang Lê Thị Thư; sang anŏ tơhan rơka mrô pơkă 1/4 Phan Quang Nam, ƀơi phường Trần Phú, plơi prong Quảng Ngãi.

Siu H’Mai: Pơblang