VOV4.Jarai - Tlam mơmot lơ 24/8, ƀơi sang bruă Khua pơ ala mơnuih ƀon sang, Khua git gai pơ ala mơnuih ƀon sang ơi Vương Đình Huệ tŭ jum Khua grup pơ ala ngă giăng mah Hàn Quốc - Việt Nam Kim Tae Nyeon ƀrô hrơi rai čuă hăng mă bruă ƀơi Việt Nam. Ƀơi mông bưp, ơi Vương Đình Huệ pơsit Việt Nam lêng kơ lăng yôm tơlơi rô nao rai hăng Hàn Quốc laih anun pơsit Hàn Quốc jing dêh čar ngă gŏp prong, yôm hloh, sui thun hơmâo tơlơi đăo gơnang nao rai ƀu kơnong amăng kual Đông Bắc Á đôč ôh mơ̆ hơmâo ƀơi đơ đam rŏng lŏn tơnah mơtăm, Kơnuk kơna Việt Nam lêng kơ ngă amuñ brơi gah bruă tuh pơ plai, wơ̆t hăng ƀing tuh pơ plai bruă prăk dŏ ngă bruă ƀơi Việt Nam.

Kơ tơlơi rô nao rai dua anom bruă čih pơkra tơlơi phiăn, Khua git gai pơ ala mơnuih ƀon sang dêh čar ơi Vương Đình Huệ lăng yôm tơlơi gơgrong bruă mơng Khua Grup pơ ala ngă giăng mah Hàn Quốc - Việt Nam hrŏm hăng ƀing khua pơ ala jing phun tơhnal tŏ tui pơtrut đĭ tơlơi ngă hrŏm kơplah wah dua Anom bruă pơ ala mơnuih ƀon sang hăng mơnuih ƀon sang dua boh dêh čar; đăo gơnang amăng rơwang bruă anai, dua Grup khua pơ ala amra pơphun ngă lu bruă jơnum bơbưp truh kih, sit nik, djru pơđĭ tui tơlơi rô nao rai giăng mah, ngă hrŏm kơplah wah mơnuih ƀon sang dua boh dêh čar.

Siu H’Mai: Pơblang