VOV4.Jarai - Mơguah lơ 10/3, Jơnum min khua apăn bruă pơ ala mơnuih ƀon sang dêh čar pơgôp hiăp brơi Tơlơi phiăn bruă sem lăng, pơsit ba mơnuih gơñ jrao ma túy mơng 12 thun truh yŭ 18 thun mut nao amăng sang añ jrao ma tuý. Pơhiăp pơphun mông jơnum, Khua git gai pơ ala mơnuih ƀon sang dêh čar ơi Vương Đình Huệ brơi thâo: Jơnum min khua apăn bruă pơ ala mơnuih ƀon sang hơmâo ngă laih hră pơ-ar, hơduah tơña tơlơi pơgôp hiăp kơ 6 mơta tơlơi. Kiăo tui hră tŭ ư hơmâo pơsit 2 mơta bruă tơña Khua ding jum Pơkra gơnam sĭ mơdrô Nguyễn Hồng Diên hăng Khua ding jum Kông ngăn hăng Ayuh hyiăng lŏn adai Trần Hồng Hà.

Ƀơi mông jơnum mơguah anai, Jơnum min khua apăn bruă pơ ala mơnuih ƀon sang dêh čar tŭ ư hrŏm kiăng hơmâo tơlơi pơtrun kơ bruă ngă hră pơ-ar sem lăng, pơsit ba mơnuih gơñ jrao ma túy mơng 12 thun truh yŭ kơ 18 thun hăng bruă ba ƀing čơđai gơñ jrao ma túy nao pơ anih añ jrao ƀu djơ̆ tơlơi bơtơhmal prăk kăk hơget ôh, anun kiăng pơƀuh rơđah tơlơi phara anai, ngă brơi hră pơ-ar amuñ, thâp pap nao rai hăng pơhlôm klă hloh kơ mơnuih arăng kiăng ba nao añ jrao.

Siu H’Mai: Pơblang