VOV4.Jarai - Mơguah lơ 14/4, ƀơi sang bruă khua pơ ala mơnuih ƀon sang, pơphun jơnum lok 19 Jơnum min apăn bruă git gai pơ ala mơnuih ƀon sang dêh čar. Pơhiăp ƀơi mông jơnum, Khua git gai pơ ala mơnuih ƀon sang dêh čar ơi Vương Đình Huệ brơi thâo: ƀơi mông jơnum, sa amăng hơdôm tơlơi yôm mơng Jơnum min apăn bruă pơ ala mơnuih ƀon sang dêh čar amra pơgôp hiăp kơ Jơlan hơdră wai lăng thun 2023; Lăi pơthâo boh than wai lăng akŏ bruă “Ngă tui jơlan hơdră, tơlơi phiăn dưm dăp prăp lui hlâo mơng hrơi Tơlơi phiăn dưm dăp prăp lui hlâo akŏ bruă hơmâo mă yua”. Ƀơi mông jơnum, khua mua pơhrua tui jơlan hơdră čih pơkra Tơlơi phiăn, tơlơi pơkôl pơkă thun 2022 Tơlơi pơtrun mơng Ƀirô khua git gai pơ ala mơnuih ƀon sang dêh čar pơhrư̆i sui hrơi mă yua abih bang tơlơi pơtrun mrô 42; tŭ ư bruă ngă hră pơ-ar tañ ƀiă, amuñ ƀiă hluai tui Tơlơi pơtrun ƀơi mông jơnum blan 5 thun anai, hrơi mă yua mơng Tơlơi pơtrun pơkă sui ƀiă dong hrơi mă yua tơlơi pơtrun 42 truh abih lơ 31/12/2023. Khua mua apăn bruă pơ ala mơnuih ƀon sang kiăng Kơnuk kơna pơhmư̆ tui hơdôm tơlơi pơgôp hiăp, pơplih glăi hră pơ-ar lăi pơthâo glăi bruă ngă tui Tơlơi pơtrun mrô 42 mơng Ƀirô khua pơ ala mơnuih ƀon sang dêh čar hăng hră rơkâo đĭ mơ-it kơ hơdôm anom bruă pơ ala mơnuih ƀon sang hăng hơdôm anom bruă pel ĕp sem lăng.

Siu H’Mai: Pơblang