VOV4.Jarai - Tlam lơ 6/5, ƀơi Hà Nội, Ding jum kông an pơphun Jơnum klah čun 1 thun ngă tui Tơlơi pơsit mrô 1 mơng Ding jum kơđi čar, klah čun glăi bruă iâu pơthưr “Akŏ pơjing kơnuih mơnuih ngă kông an khin hơtai, thâo pơmin, Bơwih brơi mơnuih ƀon sang”, Tơlơi pơtrun mă tơlơi pơgôp hiăp mơng mơnuih ƀon sang hăng apah bơni gưl Kơnuk kơna. Khua git gai pơ ala mơnuih ƀon sang ơi Vương Đình Huệ nao pơhmư̆ mông jơnum. Pơhiăp ƀơi mông jơnum, pơ ala kơ khua mua Ping gah, Kơnuk kơna, Jơnum min apăn bruă pơ ala mơnuih ƀon sang, Khua git gai pơ ala mơnuih ƀon sang dêh čar Vương Đình Huệ pơpŭ bơni hăng bơni hơ-ơč kơ hơdôm tơlơi dưi ngă hiam mơng tơhan kông an.

Amăng hrơi blan pơ anăp, ơi Vương Đình Huệ kiăng Ping gah Kông an gơnong dlông, Ding jum kông an ngă kơtang hloh bruă hrăm hăng hla tui tơlơi pơmin, tơlơi hơdip mơng Hồ Chí Minh tui hăng Tơlơi pơsit mrô 1, Tơlơi pơčrâo trun mrô 5 mơng Ding jum kơđi čar hrŏm hăng ngă tui Năm tơlơi wa Hồ pơtô kơ Kông an mơnuih ƀon sang, bruă iâu pơthưr “Akŏ pơjing kơnuih mơnuih kông an, khin hơtai, rơgơi mơbruă, thâo pơmin, bơwih brơi mơnuih ƀon sang”; biă ñu kiăng gơñăm nao bruă pơtô kơjăp tơlơi pơmin, pơtô ba tơlơi hơdip hiam, gơgrong bruă, thâo hluh djru brơi Lŏn ia, bơwih brơi mơnuih ƀon sang amăng abih bang khul tơhan.

Siu H’Mai: Pơblang