VOV4.Jarai - Tlam mơmot lơ 10/8, ƀơi sang bruă Khua pơ ala mơnuih ƀon sang, Khua git gai pơ ala mơnuih ƀon sang dêh čar ơi Vương Đình Huệ hơmâo tŭ jum Khua apăn bruă Ping gah dêh čar, Khua git gai Ping gah ƀon prong, Khua Jơnum min pơ ala mơnuih ƀon sang plơi prong jưh jom Viêng Chăn ba jơlan khua mua mơng plơi prong jưh jom Viêng Chăn A-nụ-phạp Tu-na-lom rai čuă hăng mă bruă ƀơi plơi prong jưh jom Hà Nội. Ƀơi mông bưp, dua bơnah lăi tal čuă jơmư anai pơdah rai tơlơi rô nao rai klă hiam, yôm pơphăn mơng dua Ping gah, dua kơnuk kơna.

Khua git gai pơ ala mơnuih ƀon sang dêh čar Lào lăng ba dong, djru brơi hloh hơdôm kơčăo bruă mơng anom bơwih ƀong Việt Nam glăk mă bruă ƀơi Lao amăng bruă čuk pơkra anih anom, đah mơng pơtrut pơđĭ kyar tơlơi bơwih ƀong mơng dua plơi prong jưh jom. Khul khua pơ ala mơnuih ƀon sang dua boh plơi prong jưh jom amra bơlăi nao tơlơi rơgơi, tơlơi thâo thăi ngă bruă, djru ngă kơjăp tui hơdôm anom bruă čih pơkra tơlơi phiăn mơng Viêng Chăn mă bruă tŭ yua hăng hơkrŭ kơjăp tui bruă čar, anom bruă čih tơlơi phiăn mơng dêh čar Lao lăi hrŏm.

Siu H’Mai: Pơblang