Khua git gai pơ ala mơnuih ƀôn sang dêh čar ơi Vương Đình Huệ hăng yă Megawati tŭ ư amăng hrơi blan pơ anăp, hơdôm anom bruă bơdjơ̆ nao mơ̆ng Việt Nam hăng Indonesia kiăng hơmâo hơdră ngă bruă tŭ yua hăng sit nik, đah mơ̆ng pơđĭ hloh dong tơlơi rô nao rai kơplah wah dua boh dêh čar amăng abih bang bruă, djŏp glông pôr pơhing, djŏp gưl, biă ñu lĕ Ping gah, yua dah anai lĕ atur kiăng dua boh dêh čar pơđĭ kơjăp tui tơlơi rô nao rai giăng mah, pơlir hơbit hăng Ngă gŏp yôm.

Dua bơnah tŭ ư ngă hrŏm hăng hơdôm anom bruă kơsem min boh thâo, tơlơi gêh gal, biă ñu kơplah wah Anom bruă tơlơi pơtô djơ̆ Pancasila hăng Anom bruă kơsem min, pơčeh phrâo dêh čar Indonesia yua yă Magawati ngă Khua Khul tơlơi pơtô djơ̆ Ping gah, Anom bruă kơsem min Khoa học xã hội Việt Nam, Anom bruă kơsem min boh thâo ia rơgơi. Ƀrô tal anai, ơi Vương Đình Huệ lăi glăi tơlơi pơtă mơ̆ng Khua git gai Ping gah ơi Nguyễn Phú Trọng hăng Khua mua prong mơ̆ng Việt Nam, jak iâu yă Magawati rai čuă Việt Nam dong. Yă Megawati hok mơ-ak tŭ ư, ñu lăi amra tañ rai čuă Việt Nam.