VOV4.Jarai - Tlam mơmot lơ 12/3, ƀơi Sang bruă khua pơ ala mơnuih ƀon sang, Khua git gai pơ ala mơnuih ƀon sang dêh čar, ơi Vương Đình Huệ tŭ jum Khua Grup bơwih ƀong Erax Honna Hitoshi. Khua git gai pơ ala mơnuih ƀon sang ơi Vương Đình Huệ lăi, tơlơi rô nao rai ngă hrŏm dlăm yua rơnuk rơnua hăng pơdrong asah ƀơi kual ASIA kơplah wah Việt Nam hăng Japan thun blan rơgao pơđĭ kyar klă hiam, sit nik hăng tŭ yua amăng djŏp mơta bruă. Tui hăng Khua git gai pơ ala mơnuih ƀon sang dêh čar ơi Vương Đình Huệ, jơlan đĭ kyar apui kơtrik sinh khối (apui pơkra mơng phun kyâo pơtâo) hăng pơplih hơdôm kơčăo bruă apui pơkra mơng hơdăng pơtâo ră anai jing sang măi apui lơtrik sinh khối mơng Grup Erex lăp djơ̆ hăng hơdră đĭ kyar mơng dêh čar kơ pơđĭ kyar mơtah thun 2021-2030, lăng nao pơ anăp thun 2050 mơng Việt Nam mơ̆ Kơnuk kơna phrâo pơsit. Khua git gai pơ ala mơnuih ƀon sang ơi Vương Đình Huệ pơsit, Ƀirô khua git gai pơ ala  mơnuih ƀon sang, Kơnuk kơna Việt Nam dong yua jơlan ngă bruă anai, laih dong pôr pơthâo, ră anai, tơlơi phiăn Việt Nam hơmâo tơlơi pơkă rơđah laih kơ hơdôm bruă mă đah mơng ngă amuñ brơi hơdôm anom bơwih ƀong mơng čar rơngiao tuh pơ plai bơwih ƀong ƀơi Việt Nam. Phrâo anai, Grup Erax hơmâo sem lăng ƀơi 16 boh tơring čar, ƀon prong. Mơng bruă sem lăng, Grup bơwih ƀong dưi pơphun ngă 19 kơčăo bruă hăng 1400 MW truh thun 2035; hrŏm hăng anun pok prong hloh anih pơdjuai anah phun pla phrâo, sang măi hơmâo jua apui pơđuăi kơtang hloh.

Siu H’Mai: Pơblang