VOV4.Jarai - Amăng rơwang nao čuă dêh čar Lao, čơtlăm lơ 17/5, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng Grŭp khua pơ ala gưl dlông mơng Khua pơ ala mơnuih ƀôn sang dêh čar ta hmâo nao čuă Sang hră pơtô čơđai sang hră djuai ania ƀiă Kơnuk kơna rông tơring čar Chăm Pa Sắc. Sang hră anai lĕ sa amăng hơdôm bôh sang hră yua kơ Kơnuk kơna hăng mơnuih ƀôn sang dêh čar Việt Nam pơdŏng brơi mơng thun 1999, truh kơ ră anai, sang hră hmâo djru pơtô juăt brơi lu ană bă djop djuai ania ƀiă dêh čar Lao mơng 4 bôh tơring čar gah Dơnung dêh čar Lao. Sang hră dưi hmâo lu bôh than dưi ngă klă amăng pơtô hăng pơhrăm. Biă ñu đing nao truh bruă hrăm tơlơi Yuan. Sang hră pơtô čơđai sang hră djuai ania ƀiă kơnuk kơna rông Chăm Pa Sắc ră anai hmâo rơbêh 900 čô čơđai sang hră, gah 14 djuai ania. Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, dua Ping gah, dua kơnuk kơna hmâo đing nao lu kơ mơnuih mă bruă pơtô pơhrăm, pơtô bruă kiăng pơđĭ kyar pơlar mơnuih mă bruă, kiăng djơ̆ hăng tơlơi kiăng mơng rơnuk phrâo. Gah tơlơi rơkâo mơng sang hră ƀơk brơi prăk djru hrăm hră, djru dong, pơkra glăi, pơkra ming, pơplih măi mok gơnam tam mă yua pơtô pơhrăm kơ sang hră. Khua git gai wai lăng pơ ala mơnuih ƀôn sang dêh čar ta ơi Vương Đình Huệ čih djă pioh hăng jao kơ Khua anih jưh pơ ala kơ Việt Nam ƀơi Lao hrom hăng hơdôm bôh ƀirô amăng Jơnum min gum hrom lu bruă dua Kơnuk kơna kơsem min hăng pel ĕp kiăng amăng ƀrư̆ pơsir. Ƀrô djơ̆ tal anai, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo ƀơk laih kơ ƀing čơđai sang hră rơgơi tơlơi Yuan mơng sang hră, ƀơk kơ sang hră gơnam anun lĕ hơdrôm hră, gơnam măi mok mă yua kơ sang hră hmâo nua 320 klăk prăk./.

Siu H’ Prăk: Pơblang