VOV4.Jarai - Čơtlăm lơ 26/8, ƀơi Sang mă bruă Khua pơ ala mơnuih ƀôn sang dêh čar, Khul kơsem min bôh thâo phrâo mơng Jơnum min apăn bruă Khua pơ ala mơnuih ƀôn sang gum hrom hăng Jơnum min bơwih ƀong mơng Khua pơ ala mơnuih ƀôn sang, Ding jum kông ngăn dlai tlô hăng rơhuông adai lŏn mơnai, Anom kơsem min tơlơi phiăn hăng Khul mơnuih mă bruă tơlơi phiăn Việt Nam gum hrom pơphun Bơkơtuai “Gum pơhiăp hră čih pơkra tơlơi phiăn lŏn drŏn (pơplih pơkra) tui Tơlơi pơtrun pơsit mơng Grŭp mă bruă Ping gah dêh čar ta tal 13”.

Bơkơtuai yua kơ Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng ƀing Kơ-iăng Khua git gai wai lăng pơ ala mơnuih ƀôn sang dêh čar ta git gai. Bruă bơkơtuai tal anai dưi pơphun kiăng iâu pơhrui, ngă tui bruă mă, bôh thâo ia rơgơi mơng ƀing juăt bruă mơ̆, pô kơsem min, pô wai lăng, hơdôm mơnuih hmâo tơlơi găn rơgao sit nik amăng lu bruă gum hrom amăng tơlơi gum pơhiăp, ngă giong hră čih pơkra Tơlơi phiăn lŏn drŏn (pơplih pơkra). Bôh tơhnal bơkơtuai amra dưi hmâo ƀirô mơng Khul kơsem min mơng Jơnum min apăn bruă Khua pơ ala mơnuih ƀôn sang dêh čar ta ruah mă lăi pơthâo glăi kơ hơdôm bôh ƀirô hmâo tơlơi dưi kiăng kơsem min, hơduah ĕp lăng, djru kơ bruă Khua pơ ala mơnuih ƀôn sang pel ĕp, bơkơtuai rơwang bruă Tơlơi phiăn lŏn drŏn (pơplih pơkra) pơ̆ anăp anai./.

Siu H’ Prăk: Pơblang