VOV4.Jarai - Ƀơi ƀirô mă bruă Khua pơ ala mơnuih ƀôn sang dêh čar Anglê, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo bơkơtuai hăng Khua git gai wai lăng pơ ala mơnuih ƀôn sang gơnong dlông dêh čar Anglê John Mcfall. Amăng mông bơkơtuai, dua gơñu mơ-ak lăng ƀuh, Việt Nam hăng Anglê hmâo gum hrom kơjăp hơdôm hơdră lu mơta kah hăng Sang gum hơbit djop dêh čar, Bơkơtuai gum hrom ASIA – EU (ASEM) hăng rơwang gum hrom ASEAN – Anglê, Việt Nam dŏng yua na nao Anglê pơtrut kơtang gum hrom hăng ASEAN hăng Anglê dŏng yua bruă mă phun mơng ASEAN hăng jing pô tô nao rai yôm phăn kơplah wah Việt Nam hăng EU.

Dua bơnah tŭ ư kơtưn đĭ dong bơkơtuai nao rai Grŭp khua mua, hơdôm bôh Ƀirô mơng Khua pơ ala mơnuih ƀôn sang, Grŭp Khua pơ ala mơnuih ƀôn sang giăng mah hăng ƀing khua pơ ala mơnuih ƀôn sang; lăi pơthâo nao rai tơlơi găn rơgao bruă mă mơng khua pơ ala mơnuih ƀôn sang rim bôh dêh čar; kơtưn gum hrom lăng tui hăng pơtrut ngă tui hơdôm Tơlơi pơkôl gum hrom mơ̆ Kơnuk kơna dua bôh dêh čar hmâo kĭ pơkôl, hơdôm rơwang bruă gum hrom; dŏng yua Kơnuk kơna, plơi pla, anom bơwih ƀong hăng mơnuih ƀôn sang dua bôh dêh čar kơtưn bơkơtuai nao rai, pơtrut tơlơi rô nao rai thâo hluh tơdruă hăng gum hrom hơdai bơ tŭ yua./.

Siu H’ Prăk: Pơblang