VOV4.Jarai - Prăp lui kơ bruă lăng tui akô̆ bruă ngă tui hơdră bruă tơlơi phiăn pơkrem, pơgăn prai prăk khưi khai rơwang 2016-2021, mơguah kơ 23/8, ƀơi Sang mă bruă Khua pơ ala mơnuih ƀôn sang dêh čar, Khua git gai wai lăng pơ ala mơnuih ƀôn sang dêh čar ta ơi Vương Đình Huệ nao pơhmư̆ mông mă bruă mơng grŭp lăng tui Khua pơ ala mơnuih ƀôn sang hăng Ding jum prăk kak. Pơhiăp amăng mông mă bruă, Khua git gai wai lăng pơ ala mơnuih ƀôn sang dêh čar ta rơkâo Ding jum prăk kak khom thâo djơ̆ pơkrem kơ prăk kak ƀu djơ̆ pơhrư̆i pioh kah mă prăk mă yua ôh mơ̆ djơ̆ tui pran jua mơng Tơlơi phiăn mă yua pơkrem, pơgăn prai prăk khưi khai. Tui tơlơi lăi pơthâo glăi mơng Khua Ding jum prăk kak Hồ Đức Phớc, mơng thun 2016 truh thun 2021, hơdôm bôh anom mơng Ding jum prăk kak hmâo pơkrem laih rơbêh kơ 6.000 klai prăk amăng bruă pơdŏng, pơsit lăng hlâo, pơsit mă yua, wai lăng prăk ngăn drăp kơnuk kơna. Yap truh thun 2021 Ding jum prăk kak hmâo hrŏ trun laih mrô mơnuih mă bruă hmâo 106% kơčăo bruă, hrŏ trun 36 bôh anom truh dô̆ 28 bôh anom. Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, ngă tui pơkrem, pơgăn prai prăk khưi khai ƀu djơ̆ rim thun pơkrem hơdôm hơpă prăk ôh mơ̆ yôm phăn hloh lĕ pel ĕp glăi, pơtlaih hơdôm tơlơi gun, tơlơi tơnap, pơčeh phrâo hơdră bruă pơđĭ kyar kiăng pơjing rai gơnam tam klă hmâo nua hloh./.

Siu H’ Prăk: Pơblang