VOV4.Jarai - Hmư̆ tui tơlơi jak iâu mơng Khua git gai wai lăng pơ ala mơnuih ƀôn sang dêh čar ta ơi Vương Đình Huệ, Khua git gai wai lăng pơ ala mơnuih ƀôn sang Mozambique ba jơlan hlâo Grŭp khua pơ ala Khua pơ ala mơnuih ƀôn sang dêh čar Mozambique rai čuă dêh čar Việt Nam mơng lơ 18-23/6. Mông ngă Lơphet čơkă jum Khua git gai wai lăng pơ ala mơnuih ƀôn sang Mozambique hmâo pơphun yôm phăn ƀơi Sang mă bruă Khua pơ ala mơnuih ƀôn sang amăng mơguah lơ 20/6 hăng tơlơi git gai mơng Khua git gai wai lăng pơ ala mơnuih ƀôn sang dêh čar ta ơi Vương Đình Huệ.

Tơdơi kơ mông čơkă jum hmâo laih mông bơkơtuai kơplah wah Grŭp pơ ala gưl dlông Khua pơ ala mơnuih ƀôn sang dua bôh dêh čar. Amăng mông bơkơtuai, Khua git gai wai lăng pơ ala mơnuih ƀôn sang dêh čar ta pơsit, dêh čar Việt Nam lăng yôm biă bruă gum hrom, giăng mah, phiăn juăt hăng Mozambique; jing lŏn ia kiăng đing nao pơtrut tơlơi rô nao rai bruă kơđi čar – pơtom hiăp hăng gum hrom bơwih ƀong ƀơi kual Ơi Jŭ amăng rơwang ră anai. Dua Khua git gai wai lăng pơ ala mơnuih ƀôn sang dêh čar đăo gơnang Hră čih bruă gum hrom kơplah wah Khua pơ ala mơnuih ƀôn sang dua bôh dêh čar Việt Nam hăng Mozambique dưi kĭ pơkôl amăng tal rai čuă anai amra tô nao rai dua Khua pơ ala mơnuih ƀôn sang jê̆ giăm hloh, jing tơlơi rô nao rai ngă gru kơplah wah Khua pơ ala mơnuih ƀôn sang dua bôh dêh čar; anai amra lĕ gru than tơlơi phiăn yôm phăn kiăng Khua pơ ala mơnuih ƀôn sang dua bôh dêh čar ƀu pơdơi hơkrŭ đĭ hăng pơtrut tơlơi rô nao rai gum hrom pơ̆ anăp anai./.

Siu H’ Prăk: Pơblang