Ƀrô djơ̆ tal nao pơhmư̆ Jơnum AIPA tal 44 ƀơi Jakarta, dêh čar Indonesia, Khua git gai wai lăng pơ ala mơnuih ƀôn sang dêh čar ta, ơi Vương Đình Huệ hmâo laih bruă bưp Khua git gai wai lăng pơ ala mơnuih ƀôn sang gơnong yŭ dêh čar Philippines Ferdinand Martin Romualdez.

Amăng mông bưp, Khua git gai wai lăng pơ ala mơnuih ƀôn sang dêh čar ta, ơi Vương Đình Huệ bơni hơdôm yak đĭ kyar kơtang amăng djop bruă mơ̆ng tơlơi rô nao rai gum hrŏm kơplah wah Việt Nam hăng Philippines, biă ñu pơbưp gưl dlông. Dua bơnah hmâo tŭ ư pơtrut tơlơi rô nao rai dua bôh dêh čar pơđĭ kyar sit nik, biă ñu lĕ amăng bruă bơwih ƀong – sĭ mơdrô hăng tuh pơplai, hrưn đĭ tañ pơhrui glăi mơ̆ng bruă sĭ mơdrô nao rai gơnam dua bơnah hmâo 10 klai dolar Mi. Khua git gai wai lăng pơ ala mơnuih ƀôn sang dêh čar ta rơkâo Việt Nam hăng Philippines khom gum hrŏm pioh pơđĭ kyar pơlir hơbit, ngă gal brơi kơ bruă blơi mut gơnam phun mơ̆ng Việt Nam, amăng anun hmâo braih, gơnam pioh man pơdŏng hăng hơdôm gơnam Philippines hmâo tơhnal gal hăng Việt Nam hmâo tơlơi kiăng. Dua bơnah ăt tŭ ư mơn gum hrŏm amăng dua bruă yôm phăn lĕ pơplih mrô hăng pơplih apui yua./.