Anih tŭ mă, djă pioh, pơgang hăng pơpŭ hơdôm gru grua mơng Khua pơtrun bruă tơhan Cuba kiăng djru bôh than kơsem min hăng lăi pơthâo hơdôm anô̆ yôm tơlơi pơmin mơng Fidel Castro.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng Grŭp hyu čuă anih pơdă hơdôm mơta gơnam, gru rŭp nao hrom hăng tơlơi hơdip hăng bruă ngă hơkrŭ, lăi pơthâo hơdôm nua yôm tơlơi pơmin mơng Khua mir sir Fidel Castro hăng pran jua pha ra mơng Khua mir sir Fidel Castro pioh kơ Việt Nam.

Anom Fidel Castro dưi pơdŏng hăng mă yua djơ̆ tal hơdor glăi 5 thun hrơi rơngiă Khua mir sir Fidel Castro (25.11.2016 – 25.11.2021). Anai lĕ anom blung a hăng ha sa djă anăn khua mir sir Fidel Castro. Kơnuk kơna Cuba hmâo mă yua laih sa tơlơi pơtrun yôm phăn kơ bruă pơdŏng anom anai yua kơ čang rơmang lom dô̆ hơdip mơng Fidel lĕ tơdơi kơ rơngiă, ƀu hmâo jơlan ƀôn prong, đang bơnga, sang hră, sang ia jrao ƀudah hơdôm anom hơpă, anom bruă hơpă djă anăn ñu./.