VOV4.Jarai - Amăng tal nao čuă dêh čar Lao, mơguah lơ 16/5, ƀơi plơi prong jưh jom Viêng Chăn, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi pơthâo, ră ruai hăng ơi Thoong-lun Xỉ-xu-lít (Thongloun Sisoulith), Khua git gai Ping gah, Khua mir sir dêh čar Lao.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ đăo gơnang mơnuih ƀôn sang Lao adơi ayong amra yak rơgao djop tơlơi lông, ngă tui truh kih Tơlơi pơtrun pơsit Jơnum Ping gah đơ đam dêh čar tal 11 hăng kơčăo bruă pơđĭ kyar bơwih ƀong – mơnuih mơnam 5 thun tal 9, pok pơhai truh kih hơdôm bruă pok bah amăng, hơkrŭ glăi bơwih ƀong, hơđong bơwih ƀong hăng prăk kak prong, pơjing bruă mă, pơdŏng dong lŏn ia Lao rơnuk rơnua, rơngai, pơlir hơbit, pơdrong asah tui tơhnal pơkă djop mơnuih dưm kơnar. Dua gơñu lăi rơđah pơ̆ anăp anai, dua bơnah khom ngă tui prong phiăn juăt gum hrom, đăo gơnang; gum hrom pok pơhai tơpă hơdôm tơlơi pơkôl gưl dlông; gir run kơtưn hăng pơđĭ tui hloh dong bôh tơhnal gum hrom dua bơnah amăng abih bang hơdôm bruă, yua kơ bôh tŭ yua sit nik mơng mơnuih ƀôn sang dua bôh dêh čar./.

Siu H’ Prăk: Pơblang