Khua git gai wai lăng pơ ala mơnuih ƀôn sang dêh čar ta, ơi Vương Đình Huệ pơdah pran jua mơ-ak čơkă mă tơlơi jak iâo mơng Khua git gai wai lăng pơ ala mơnuih ƀôn sang gơnong yŭ Puan Maharani nao čuă Indonesia, pơhmư̆ Jơnum Khul Khua pơ ala mơnuih ƀôn sang hơdôm bôh dêh čar kual Đông Nam Á tal 44 (AIPA-44), čuă ƀôn prong Jakarta klă hiam.

Lăi rơđah tơlơi rô nao rai kơplah wah dua bôh dêh čar glăk pơđĭ kyar klă hiam, Khua git gai wai lăng pơ ala mơnuih ƀôn sang dêh čar ta pơtŏng sit tal nao čuă lĕ kiăng kơtưn tơlơi rô nao rai kơplah wah dua bôh dêh čar amăng abih bang hơdôm glông pôr hăng hơdôm gưl, amăng anun hmâo Ping gah, Khua pơ ala mơnuih ƀôn sang, Gong gai dêh čar, tơring čar, ƀôn prong hăng bơkơtuai mơnuih ƀôn sang. Khua git gai wai lăng pơ ala mơnuih ƀôn sang dêh čar ta brơi thâo, anai lĕ tal nao čuă sit nik pơ̆ Indonesia blung a hăng sa čô Khua git gai wai lăng pơ ala mơnuih ƀôn sang dêh čar, pơdah pran jua lăp djă pioh ƀơi anăp tơlơi pơđĭ kyar mơ̆ng Plơi prong jưh jom Jakarta – plơi prong jưh jom prong hloh, hmâo mrô mơnuih kơnong kơ 3% samơ̆ gum hơgôp truh 20% brơi kơ GDP mơ̆ng đơ đam dêh čar Indonesia. Khua git gai wai lăng pơ ala mơnuih ƀôn sang dêh čar ta čang rơmang plơi prong jưh jom dua bôh dêh čar kơtưn gum hrŏm, lăi pơthâo nao rai tơlơi găn rơgao pơđĭ kyar, biă ñu lơm kơplah wah Hà Nội hăng Jakarta pơkă hlâo amra hmâo jơlan por tơpă truh pơ̆ dua bôh dêh čar./.