VOV4.Jarai - Mơguah lơ 19/7, Khua git gai wai lăng pơ ala mơnuih ƀôn sang dêh čar ta ơi Vương Đình Huệ tŭ jum Khua Grŭp git gai Ping gah, Kơ-iăng Khua mir sir dêh čar Lao ơi Bounthong Chitmany hăng Grŭp khua pơ ala gưl dlông Ping gah, Kơnuk kơna Lao glăk dô̆ čuă hăng mă bruă ƀơi dêh čar Việt Nam. Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, hrom hăng bruă dua bôh dêh čar ngă tui tơpă tơlơi pơkôl gưl dlông kơplah wah dua Ping gah, dua Kơnuk kơna, dua Khua pơ ala mơnuih ƀôn sang hmâo pơkôl gum hrom rơđah rơđông biă.

Amăng tal nao čuă dêh čar Lao lơm blan 5/2022, dua Khua git gai wai lăng pơ ala mơnuih ƀôn sang dua bôh dêh čar hmâo kĭ laih tơlơi pơkôl gum hrom kiăng pơđĭ tui bruă gum hrom hăng ba glăi bôh tơhnal kơplah wah dua Khua pơ ala mơnuih ƀôn sang, djru hrom amăng bruă ngă kơjăp, pơđĭ kyar tơlơi rô nao rai kơplah wah dua Ping gah, dua Kơnuk kơna hăng mơnuih ƀôn sang dua bôh dêh čar. Ngă tui tơlơi pơkôl phrâo kĭ, Kơ-iăng Khua git gai wai lăng pơ ala mơnuih ƀôn sang dêh čar Lao Sommad Pholsena hmâo ba jơlan hlâo grŭp khua pơ ala kơ gưl dlông Khua pơ ala mơnuih ƀôn sang dêh čar Lao rai čuă mă bruă ƀơi Việt Nam kiăng bơkơtuai, kơsem min tơlơi găn rơgao lăng tui, tơlơi pơsit hơdôm tơlơi yôm phăn lŏn ia, biă ñu amăng bruă tuh pơplai bruă hrom hăng wai lăng bruă prong./.

Siu H’ Prăk: Pơblang