VOV4.Jarai - Tŭ jum Grŭp Jơnum min wai lăng bruă sĭ mơdrô jar kơmar mơng Khua pơ ala mơnuih ƀôn sang kual Mi Kô̆ yua kơ ơi Bernad Lange ba jơlan hlâo rai čuă hăng mă bruă ƀơi dêh čar Việt Nam, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, Khua pơ ala mơnuih ƀôn sang hăng hơdôm ƀirô apăn bruă mơng Việt Nam amra gum hrom hăng Khul pơlir hơbit kual Mi Kô̆ kiăng pơtrut ƀing ding kơna pơkon mơng EU pơsit hăng pok pơhai Tơlơi pơkôl sĭ mơdrô tui hluai pô kơplah wah Việt Nam hăng EU.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi lĕ, tal rai čuă mơng Jơnum min wai lăng bruă sĭ mơdrô jar kơmar mơng Khua pơ ala mơnuih ƀôn sang kual Mi Kô̆ pơphun amăng mông Việt Nam hăng EU hmâo tơlơi rô nao rai sit nik amăng abih bang bruă phun kơđi čar, pơtom hiăp, rơnuk rơnua, pơgang lŏn ia, bơwih ƀong hăng hơdôm bruă pơkon. Khua git gai wai lăng pơ ala mơnuih ƀôn sang rơkâo, EU djă dong bruă pơhlôm rơnuk rơnua, hơđong gah jơlan ia rơsĭ hăng rơhuông adai ƀơi ia Rơsĭ Ngŏ; ngă dơlăm hloh dong hơdôm tơlơi rô nao rai mơng Việt Nam hăng EU hrom hăng hơdôm bôh dêh čar ding kơna amăng hơdôm mông bơkơtuai lu bơnah; kơtưn dong bruă gum hrom kơplah EU hăng ASSEAN, biă ñu pơtrut bruă mă mơng ASEAN ƀơi Ấn Độ Dương hăng Thái Bình Dương./.

Siu H’ Prăk: Pơblang