VOV4.Jarai - Čơtlăm mơmot lơ 6/9, ƀơi Sang mă bruă Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo tŭ jum Ding kơna Grŭp mă bruă Ping gah mơnuih ƀôn sang dêh čar Kur (CPP), Khua plơi prong jưh jom Phnôm Pênh ơi Khuông Sơ-reng, ba jơlan hlâo Grŭp khua pơ ala gưl dlông plơi prong jưh jom Phnôm Pênh rai čuă hăng mă bruă ƀơi plơi prong jưh jom Hà Nội.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơsit, hơdră pơtrun ha sa mơng Ping gah, Kơnuk kơna Việt Nam lăng yôm na nao tơlơi rô nao rai “Jê̆ giăm klă hiam, giăng mah mơng hlâo, gum hrom abih bang, kơjăp phik sui thun” hăng Kur amăng abih bang hơdôm glông Ping gah, Gong gai, Khua pơ ala mơnuih ƀôn sang.

Amăng mông thun 2022 hmâo bôh tŭ yua yôm phăn lĕ Thun giăng mah Việt Nam – Kur, hơdor glăi 55 thun hrơi pơdŏng bruă pơtom hiăp kơplah wah dua bôh dêh čar, Khua git gai wai lăng pơ ala mơnuih ƀôn sang rơkâo dua plơi prong jưh jom bơkơtuai tŭ ư hrom dong hăng pơtrut hơdôm bruă bơkơtuai, hơdôm bruă gum hrom, lăi pơthâo tơlơi găn rơgao amăng lu bruă kah hăng bơwih ƀong sĭ mơdrô, tuh pơplai, tuai čuă ngui; čang rơmang, Khua plơi prong jưh jom Phnôm Pênh đing nao, ngă gal brơi kơ hơdôm bôh anom bơwih ƀong, mơnuih ƀôn sang Việt Nam glăk dô̆ hơdip mơda, mă bruă ƀơi lŏn ia Kur./.

Siu H’ Prăk: Pơblang