VOV4.Jarai - Amăng rơwang rai čuă dêh čar Việt Nam, čơtlăm lơ 22/6, Khua git gai wai lăng pơ ala mơnuih ƀôn sang dêh čar Mozambique hăng Grŭp khua pơ ala gưl dlông Khua pơ ala mơnuih ƀôn sang Mozambique hmâo nao čuă hăng mă bruă hăng ƀôn prong Cần Thơ. Bơkơtuai hăng Khua git gai Ping gah ƀôn prong Cần Thơ, Khua git gai wai lăng pơ ala mơnuih ƀôn sang Mozambique pơsit yôm tơlơi rô nao rai klă hiam kơplah wah Khua pơ ala mơnuih ƀôn sang Việt Nam hăng Mozambique hluai tui Hră čih hơdor pioh gum hrom kơplah wah Khua pơ ala mơnuih ƀôn sang Việt Nam hăng Mozambique. Gah gum hrom pơ̆ anăp anai, ơi Lê Quang Mạnh, Khua git gai Ping gah ƀôn prong Cần Thơ brơi thâo amra lăi pơthâo tơlơi găn rơgao rông akan hơdang hăng tơjŭ pla, bôh thâo amăng bruă bơwih ƀong huă, ngă đang hmua, pơkra gơnam tam, pơđĭ tui mrô gơnam hăng anô̆ klă gơnam mă mơng đang hmua, akan hơdang; Gum hrom tuh pơplai pơđĭ kyar anih anom pơdjuai pơjeh, hlô rông hăng akan hơdang klă hiam, pơdong kual ngă hmua pơdai hiam tui hơdră hmua pơdai prong, pơdŏng kual rông hlô pơhlôm huăi hmâo klin ruă ngă, gum hrom lăi pơthâo nao rai tơlơi găn rơgao amăng pơkra, rak pioh, pơgang gơnam ngă rai, đĭ tui nua gơnam ba jơlan hlâo, gum hrom bơkơtuai, blơi sĭ gơnam mă mơng đang hmua./.

Siu H’ Prăk: Pơblang