VOV4.Jarai - Tô̆ tui jơlan hơdră tal jơnum lok 3, mơguah lơ 14/6, Khua pơ ala mơnuih ƀôn sang hmâo pơsit pel ĕp Tơlơi phiăn Tơhan polih hơdeč hmar hăng Tơlơi pơtrun pơsit kơ bruă pơdŏng Grŭp lăng tui akô̆ bruă mơng Khua pơ ala mơnuih ƀôn sang dêh čar ta thun 2023. Hăng 91,16% mrô hră khua pơ ala mơnuih ƀôn sang ƀuh ƀô̆ tŭ ư, Khua pơ ala mơnuih ƀôn sang hmâo pel ĕp Tơlơi phiăn Tơhan polih hơdeč hmar. Phiăn hmâo 5 črăn, 33 mơta tơlơi, tơlơi pơkă: Tơhan polih hơdeč hmar lĕ khul tơhan mơnuih ƀôn sang gah Kông ang mơnuih ƀôn sang Việt Nam, jing khul tơhan phun pơgang rơnuk rơnua lŏn ia, pơhlôm hơđong, pơhlôm klă mơnuih mơnam. Tơlơi phiăn pơkă hơdôm bruă hmâo kom khut khăt, amăng anun hmâo kom bruă kơdŏng glăi, ngă gun bruă mă mơng Tơhan polih hơdeč hmar. Kom la mă, pơđup prăk ƀudah hmâo bruă ngă pơgô̆ mơnuih apăn bruă tơhan, tơhan polih hơdeč hmar ngă soh hăng tơlơi dưi pô, bruă mă dưi jao. Tơlơi phiăn ăt pơkă mơn mơnuih apăn bruă tơhan, tơhan Polih hơdeč hmar pơpŭ hăng pơgang tơlơi dưi pô, bôh tŭ yua djơ̆ phiăn mơng ƀirô, khul grŭp, mơnuih; lăi pơthâo kơjăp hăng mơnuih ƀôn sang, pơpŭ, luă gŭ, abih pran jua bơwih brơi kơ mơnuih ƀôn sang. Khin hơtai, kơđiăng, amra kơdŏng glăi tơlơi sat, ngă giong klă djop bruă mă dưi jao./. 

Siu H’ Prăk: Pơblang