VOV4.Jarai - Ƀơi ƀirô mă bruă Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ bưp ƀing đah kơmơi ngă khua pơ ala mơnuih ƀôn sang gơgrong bruă gah Kơnuk kơna hăng đah kơmơi ngă khua git gai, wai lăng gah Anom bruă Khua pơ ala mơnuih ƀôn sang ƀrô djơ̆ hrơi Jar kơmar pioh kơ đah kơmơi lơ 8/3. Khua git gai wai lăng pơ ala mơnuih ƀôn sang dêh čar ta ơi Vương Đình Huệ bơni, pơsit yôm hơdôm tơlơi gir run ƀu pơdơi mơng rim čô khua pơ ala mơnuih ƀôn sang, amăng anun hmâo ƀing đah kơmơi gơgrong bruă mơng rơwang bruă Khua pơ ala mơnuih ƀôn sang tal 15. Hăng Khua pơ ala mơnuih ƀôn sang, rơwang bruă phrâo rơgao, Khul khua pơ ala mơnuih ƀôn sang dêh čar Việt Nam leng kơ hmâo mrô đah kơmơi lu biă bơhmu hăng hơdôm bôh dêh čar amăng kual hăng rŏng lŏn tơnah; anô̆ kơjăp bruă mă hăng mơng ƀing đah kơmơi jai hrơi dưi pơđĭ tui. Ƀơi anăp hơdôm tơlơi kiăng kơ bruă mơng lŏn ia amăng rơwang pơđĭ kyar phrâo, Khua git gai wai lăng pơ ala mơnuih ƀôn sang dêh čar ta ơi Vương Đình Huệ rơkâo: ƀing đah kơmơi ngă khua pơ ala mơnuih ƀôn sang gơgrong bruă gah Kơnuk kơna hăng đah kơmơi git gai, wai lăng gưl kơnuk kơna mơng Anom bruă Khua pơ ala mơnuih ƀôn sang hrăm tui dong, pơđĭ tui dong bôh thâo, djru pơđĭ tui prong hloh dong bôh tơhnal bruă mă mơng Khua pơ ala mơnuih ƀôn sang; gum hrom ba glăi bôh tơhnal amăng bruă pơkă hơdră bruă pơhlôm tơlơi dưi mơng đah kơmơi hăng čơđai muai, ngă tui tơhnal pơkă dưm kơnar bơnai hăng rơkơi, ngă giong klă bruă gơgrong mơng Pô khua pơ ala mơnuih ƀôn sang, lăp djơ̆ hăng pran đăo gơnang mơng mơnuih ƀôn sang đơ đam dêh čar./.

Siu H’ Prăk: Pơblang