Khua git gai wai lăng pơ ala mơnuih ƀôn sang Vương Đình Huệ pơtŏng sit, Việt Nam lăng yôm hăng pơsit pran pơtrut tơlơi rô nao rai gum hrŏm bruă hăng dêh čar Malaysia jai hrơi jai nao dơlăm, sit nik hăng ba glăi bôh tơhnal.

Hluai tui tơlơi rô nao rai bruă kơđi čar klă hiam hăng đăo gơnang nao rai tơdruă, Khua git gai wai lăng pơ ala mơnuih ƀôn sang Vương Đình Huệ hăng Khua dêh čar Anwar Ibrahim hmâo bơkơtuai nao rai mơ-ak klă kơ lu mơta bruă gum hrŏm kơplah wah dua bôh dêh čar pơ̆ anăp anai, pơtrut ngă giong hơdôm tơlơi pơkôl gum hrŏm yôm phăn kơplah wah dua bôh dêh čar. Dua bơnah lăi rơđah tơhnal yôm phăn mơng bruă pơđĭ kyar sĭ mơdrô dua bơnah tui jơlan gah dưm kơnar hloh; gum hrŏm pel ĕp, kơsem min, pơjing hơdră pơtrut gum hrŏm amăng bruă hyu mă, pơkra hăng sĭ akan hơdang yua kơ anai lĕ bruă dua bơnah hmâo tơlơi kiăng hăng amra dưi pơhrua nao rai tơdruă; dŏng yua gum hrŏm; djru anom bơwih ƀong ƀơi Việt Nam amăng gơnong bruă măi mok pơkra gơnam ƀong huă Halal mơ̆ Malaysia hmâo pran gơgrong prong hăng Việt Nam hmâo lu tơhnal gal. Khua dêh čar Malaysia tŭ ư pel ĕp, đĭ mrô gơnam blơi mơ̆ng Việt Nam./.