VOV4.Jarai - Hmư̆ tui tơlơi jak iâu mơng Kơnuk kơna Hàn Quốc, Khua Grŭp apăn bruă Ping gah dêh čar ơi Võ Văn Thưởng ba jơlan hlâo Grŭp khua pơ ala kơ Ping gah dêh čar ta amra nao čuă dêh čar Hàn Quốc truh lơ 4/8/2022. Bôh than mơng tal nao čuă kiăng pok pơhai jơlan gah pơtom hiăp rơngai, gơgrong pô, rơnuk rơnua, giăng mah, gum hrom hăng pơđĭ kyar, pơplih phrâo lu mơta, pơplih phrâo tơlơi rô nao rai pơtom hiăp lĕ gơyut, pô gum hrom đăo gơnang hăng jing ding kơna klă, hmâo bruă gơgrong amăng khul jar kơmar, amăng anun lăng yôm bruă pơtrut kơtang hăng dơlăm hloh tơlơi gum hrom dua bơnah hăng hơdôm bơnah gum hrom, biă ñu Hàn Quốc jing bơnah gum hrom yôm phăn mơng Việt Nam. Pơkă hlâo amăng tal nao čuă mơng ơi Võ Văn Thưởng amra nao lăi pơthâo kơ Khua dêh čar Hàn Quốc, bưp Khua git gai Ping gah Pran kơtang Mơnuih ƀôn sang dêh čar, bưp khua pơ ala git gai Ping gah Dân chủ Đồng hành, tŭ jum Khua Khul giăng mah Hàn Quốc – Việt Nam, tŭ jum Khua Grŭp hơdôm mơnuih Hàn Quốc hmâo pran đăo gơnang; tŭ jum Khua Khul hơdôm mơnuih Hàn Quốc khăp kơ Việt Nam, čuă Ƀirô anih jưh pơ ala kơ Việt Nam ƀơi Hàn Quốc./.

Siu H’ Prăk: Pơblang