VOV4.Jarai - Amăng dua hrơi lơ 2 hăng 3/8, amăng tal nao čuă hăng mă bruă ƀơi dêh čar Hàn Quốc, Khua gum bruă git gai Ping gah dêh čar ơi Võ Văn Thưởng hăng Grup khua mua mơng Ping gah Việt Nam hơmâo lu bruă pơbưp, bơkơtuai hăng khua mua dêh čar Hàn Quốc, amăng anun hơmâo bưp Khua git gai pơ ala mơnuih ƀon sang Hàn Quốc Kim Jin Pyo, Khul khua git gai Ping gah Pran kơtang mơnuih ƀon sang ƀơi Ƀirô khua pơ ala mơnuih ƀon sang, Khul khua pơ ala bruă ngă giăng mah Hàn - Việt, Jơnum bơkơtuai bruă bơwih ƀong - gru grua boh thâo Hàn Việt, Khul mơnuih Hàn Quốc khăp kơ lŏn ia Việt Nam. Ƀơi mông bưp Khua git gai pơ ala mơnuih ƀon sang dêh čar Kim Jin Pyo hăng hơdôm anom bruă kơnuk kơna mơng Hàn Quốc, ơi Võ Văn Thưởng pơsit pơtrut tui hloh tơlơi rô nao rai hăng Hàn Quốc hơmâo laih Khua git gai Ping gah Nguyễn Phú Trọng lăi nao ƀơi mông jơnum mơng ataih hăng Khau mir sir Hàn Quốc Yoon Suk Yeol; rơkâo Khua git gai pơ ala mơnuih ƀon sang Kom Jin Pyo dong yua bruă dua bơnah ngă hrŏm gah kơđi čar hluai tui mông jơnum bơkơtuai djŏp gưl, pơtrut ngă hrŏm bơwih ƀong, sĭ mơdrô hăng tuh pơ plai.

Siu H’Mai: Pơblang