VOV4.Jarai - Tô̆ tui tal nao čuă hăng hơ-ư̆č hmưi Tết Ping gah, gong gai hăng mơnuih ƀôn sang tơring čar Quảng Ngãi, čơtlăm lơ 17/1, Khua gum bruă Grŭp git gai Ping gah, ơi Võ Văn Thưởng, gum hrom Grŭp hyu mă bruă mơng Kơnuk kơna hmâo nao mơ-ak hrom hăng Jơlan hơdră “Tết tum jơngum – Bơyan bơnga rơnuk rơnua 2022” hăng ƀơk gơnam tam Tết hơdôm rơtuh čô mơnuih mă bruă ƀơi Kual sang măi VSIP Quảng Ngãi, pơ̆ să Tịnh Phong, tơring glông Sơn Tịnh; Bưp ƀô̆ mơta, hơ-ư̆č hmưi Tết mơnuih apăn bruă, mơnuih mă bruă Sang bruă pơčruh hrom prăk bơwih ƀong djong ia jâu Bình Sơn, Kual bơwih ƀong Dung Quất. Tết thun anai, Khul pơlir hơbit mơnuih mut phung tơring čar Quảng Ngãi pok pơhai lu bruă mă bơwih brơi hăng anăn ñu “Tết tum jơngum – Bơyan bơnga rơnuk rơnua 2022” hăng jơlan gah abih bang mơnuih amăng khul hăng mơnuih mă bruă leng kơ hmâo Tết. Mơng anun, Khul mut phung hơdôm gưl hmâo djru laih giăm truh 65 rơbâo čô mơnuih hăng mrô prăk rơbêh kơ 19 klai prăk; pơsur djru 700 čô mơnuih amăng khul, mơnuih mă bruă, mơnuih mut phung Grŭp mơnuih hyu mă akan hơdang hăng mrô prăk 700 klăk prăk, ƀơk brơi 25 bôh sang dô̆ khul mut phung hăng mrô prăk sa klai prăk... Nao mơ-ak hrom Jơlan hơdră “Tết tum jơngum – Bơyan bơnga rơnuk rơnua 2022”, Khua gum bruă Grŭp git gai Ping gah, ơi Võ Văn Thưởng pơsit yôm tơlơi pơčeh phrâo mơng Khul mut phung Việt Nam amăng bruă djă pioh 7 thun pơphun Tết tum jơngum hăng hơdră pơkă jai hrơi jai prong tui, djru sit nik, bơwih brơi tơlơi hơdip kơ mơnuih mă bruă amăng tal Tết./.

Siu H’ Prăk: Pơblang