VOV4.Jarai - Mơguah lơ 17/1, ƀơi tơring čar Quảng Ngãi, ơi Võ Văn Thưởng, Ding kơna Ding jum kơđi čar, Khua gum bruă Ping gah hrŏm hăng Grup khua mơng Ping gah dêh čar nao čuă, hơ-ơč hmưi tê̆t kơ ƀing khua, khua mua hơđăp ƀơi tơring čar Quảng Ngãi, brơi gơnam tê̆t kơ hơdôm boh sang anŏ tơhan djai pơsăn drơi jăn kơ lŏn ia, sang anŏ hơkrŭ lŏn ia, tơhan rơka, tơhan blah ngă sông kơtang hăng sang anŏ rin ƀơi tơring glông Minh Long.

Pơhiăp ƀơi mông bưp, ơi Võ Văn Thưởng pơhmư̆ tơlơi pơgôp hiăp mơng ƀing khua hơkrŭ lŏn ia, khua mua hơđăp git gai tơring čar Quảng Ngãi, gum pơgôp pơđĭ kyar plơi pla, lŏn ia. Khua khul git gai bruă Ping gah ơi Võ Văn Thưởng đăo gơnang, hăng tơlơi gum pơgôp, gir run mơng Ping gah, gong gai hăng abih bang mơnuih ƀon sang, tơring čar Quảng Ngãi amra hơmâo lu tơlơi pơplih phrâo amăng hrơi blan pơ anăp.

Siu H’Mai: Pơblang